Beyond the last black hole

- Clamando a TK12, clamando a TK12, cambio - deciba renueca ta no dengún.

- Cómo van a escuitar-me, no sé qué soi fendo - reconoixeba con ixa dolenta sensación en las visceras quan sabes que el destín ye estau chugando a es dados y la chugada no ye brenca favorable ta tu.

La base espacial s'alcontraba a l'atro costau del zaguer forau negro descubierto. 300.000 anyos-luz de distancia entre la base y el planeta an que heba aterrizau. Bueno, aterrizau ye una forma de decir-lo, perque bella cosa heba fallau y la nau heba tombau contra el planeta. Heba puesto controlar el chusto la nau ta no acabar feta polvo, pero la nau, ya no podeba volar, ni flotar, ni cosa.

No sabeba a on yera. El planeta no amaneixeba en las cartas de navegación. No yera ixe el suyo destín pero no heba puesto cambiar la dirección. S'encarretaba ta unatro sistema a fer-ie estudios scientificos. Ya no podrá. La unica suya esperanza yera que es fados tornasen a tirar es dados y en la suya busqueda, bell equipo de rescate pasase per allí.

- No me ferá el morro cloc - pensaba pesimista y empitada mientres sobateba el cap en sinyal de negación.

Se va pasar es didos per la cara y va veyer la sangre fresca surtindo de las nafras. El va recordar a quan aprendeba a dir en bicicleta, quan se cayeba y se feba mal. La sangre surtindo mientres ploraba y se miraba al suyo pai y la suya mai. Va aprender a dir en bicicleta, y china-chana fue recorrendo el camín ta aprender a volar en una nau espacial. Pero talment el suyo camín de pilotar vehíclos acababa aquí.

- No sé si tornaré a veyer a pai y mai. No sé si tornaré a veyer a denguna persona unatra vez - se deciba a sí mesma mientres forzaba la puerta ta salir de la nau entre el fumo que quedaba de blandas amortadas.

Va pensar en tornar a clamar a la base, pero sabeba que yera per demás. Si el mensache arriba, el ferá en 300.000 anyos. El sistema de comunicación que funcionaba con foraus de cuco microscopicos, que permitiban a es sinyals transmitius viachar mas veloz que no la luz, yera esmarchinau, u cal que fuese estricallau de tot. No teneba conoiximientos ta saber-lo. Ya heba prebau tot el que ella podeba fer, y cosa. L'unico que podeba fer yera salir-ne, de la nau.

Ya heba visto que el planeta que yera la nueva casa suya, u la suya fuesa, yera habitable. La gravedat yera un 94% de la normal, y l'oxicheno arribaba basta el 40% de l'atmosfera. Talment per ixo le heba costau tanto d'amortar l'incendio. 

Heba caito en una placha. I heba augua cerca, u ixo creyeba. Pero preferiba d'estar segura y va decidir de no acercar-se ta'l mar desconoixiu. La temperatura yera buena, pero teneba calor con el trache espacial meso. El casco de la escafandra, con el visor con bella fenderilla ubierta, el portaba baixo el brazo drecho. Va caminar qualques metros, dirección no se sabe.

- ¿Te tornaré a veyer? - Se preguntaba al suyo cap contino.

Va abanzar bell metro mas y va cayer achenullada per tierra. Va deixar el casco y va meter-se a plorar. 

Las glarimas se trafucaban con la sangre que cayeba per la cara. Va mirar en bella pocha y va quitar un fumarro y un briquet. Se va posar en l'arena y se va encender el fumarro.

- Talment siga el zaguer - comentaba con tristura y resignación.

- A disfrutar-lo - tornó a decir ta ella mesma, dengún no la podeba escuitar.

Quan va acotolar-lo, va tornar a devantar-se. Se va mirar l'horizont y es suyos peus van encomenzar a caminar. ¿Enta a on? Ixo no'l sabeba. De feto no sabeba cosa. Nomás que una fuerza irresistible le heba feto venir a buenas ta fer-lo. Talment a l'atro costau d'es chicotz monts que columbraba teneba la solución. U talment bell animalot se la mincharía, si ye que n'i heba. U talment se i trobaría con bell alienichena amigable y podese tornar ta casa.

- En rabio de tornar a veyer-te como nunca - mormostiaba mientres se miraba enta'l ciel.

Per agora no podeba que caminar, mientres es filos que la ligaban a l'universo se moveban d'acuerdo a una partida de dados.

The Black Sheep

Timisoara'89

Un día, unatro... Lo treballo, precario y aburriu, yera en os zaguers días l'unico que me feba salir de casa. Cruzando la ciudat a ritmo de pedal me mescluciaba con o soniu agresivo d'os motors d'os coches que me rodiaban en cada ida y vuelta d'o treballo.

Siempre i heba un punto d'o recorriu que me clamaba l'atención. Astí amaneixeba, en bell medio d'o semaforo que yo nunca no pillaba en verde, con a suya barba ya mas grisa que negra, mas propia d'a suya cinqüentena, con os suyos pels sin ateclar, los suyos vaquers negros y l'abrigo de color marfil, ya maltractau. Siempre con os suyos paquetz de moquers, fendo un poder por vender-ne a tot qui parase en ixe semaforo en frent d'a Puerta d'o Carmen.

Siempre me feba cargo d'o suyo cenyo aspro, d'os suyos uellos sin ilusión que gosaban mirar-se enta garra puesto, mesmo si yera charrando con bella persona. Un día qualsiquiera, un día que podría estar borrau d'o calendario sin importa-le a nenguna, un día en que morir y vivir son sinonimos, decidié de fer bella cosa diferent, quereba sentir-me viva.

Enfilaba por Hernán Cortés pedaleyando a toda vitesa, con o mío endometrio plorando glarimas royas, prebando de conquistar lo semaforo debant d'a Puerta d'o Carmen qual isla d'Okinawa. Pero en no poder hizar-ie la bandera d'a victoria debant d'a color roya, torné la mía atención enta lo vendedor de moquers.

De segundos, en teneba vintiséis, asinas que me lo miré fito-fito y ell uns segundos dimpués (en quedaba vintidós) para cuenta d'o mío interés.
- ¿Garra moquero? - pregunta lo vendedor.
- Sí, un paquet, por favor – respondo con a voz timida y a mirada esquiva.
- Un euro – se le distinguiba l'accento rumano.

Niervosa buscaba en a pocha lo portamonedas (quedaba tretze segundos) y acerté a trobar una moneda de dos euros que le die en a man curtida por lo tiempo y lo treballo. (Seis segundos). M'acercó lo paquet de moquers que portiaba en a suya mochila y rechiró en una bolsa con monedas lo mío cambio. (Dos segundos).

Con o semaforo ya cambiau a lo psicopatico verde, alcé la moneda en a pocha a escape mientres, sin saber por qué, talment a mía camiseta, ell se despidió saludando con o punyo zarrau en o pulso. Se me fació extranio que nomás recibise un chufliu d'a chent que nunca no se levanta d'a cama cinco minutos antes, antes de fer frent a nuevas pedaladas enfilando ta l'avenida Cesar Augusto. Entre que soltaba un escupito ta un motorista que me pasabe debant rozando-me, me pensaba sobre quí sería realment o curioso vendedor de moquers d'a Puerta d'o Carmen. ¿Qué historia i habría dezaga?

Treballo, aburrida. Inventaba historias sobre un hombre que ha marchau d'a suya Rumanía natal ta unatro país que o capital fa miquetas día sin atro. ¿Sería acomodau? ¿Tendría familietas? ¿Lo perdió tot con a plegada d'o capitalismo? Tantas dubdas en teneba que en plegar, ya teneba pa fer un libro sobre ell.

Curiosa como soi, agarrapicé lo manillar con a suya forma de craba (de craba roya, m'entrefilaba a veces) y chafaba los pedals entre que la plevida me chipiaba, hue solo por fuera, atras veces tamién por dentro.

“Okinawa” a la vista, reblé en l'intento de cruzar en verde imposible, esta vez en l'atro sentiu, dende la Puerta d'o Carmen. Plegué t'a linia de detención pintada por tierra y allí fue apresada como de cutio. Lo protagonista d'as mías barucas que levaban tot lo día acazando-me, yera debant d'os míos uellos (vintiséis segundos). No creyeba que fuese a viyer-lo baixo toda esta plevida de primavera, pero pareixeba resistir-se a deixar los suyos moquers. Se me miraba extraniau, con una mirada que amostraba una mena de compasión aspra (vintitrés segundos). Reclamé la suya atención con a man dreita semilevantada y endrezó enta yo con ixa mirada d'a que no podié fer-me-ne.

Reunié fuerzas y... (decinueu segundos).
- Disculpe sinyor, ¿le aganaría que nos fésenos un café? ¡Se ye chipiando! - Pronunciaba mientres la voz delataba un tierratremo interno de ueito sobre diez en a escala de Richter.
- ¿Y tu me lo dices? - Contestó quasi fendo-se-ne la risa. (Dotze segundos).

Momento en que me facié cargo que talment m'heba extralimitau en o mío interés por lo vendedor de paquetz de moquers de cinquanta anyos rumano y me facié chicota. Manimenos, caricacha como en yera, me chiré de nuevas enta ell y le dicié:
- Bueno, vende-me bell paquet, que con l'alerchia no adubo...
- Un euro – dició mientres pillaba un paquet y me l'acercaba (Diez segundos, cuenta enta zaga en Baikonur).
- Tiene – contesté dimpués de buscar y trobar dos monedas de cinquanta centimos.
- Mersi, buen viache (quatro, tres, dos, uno...).

Despegué de “Baikonur” quasi esbarizando-se os pietz d'os pedals y concaré os siguients quince minutos que me quedaba ta casa.

Pasau lo cabo de semana sin mas interés que respirar y dormir (lo mío premio recibiu en acabar cada viernes), unatra vez la rueda tornaba a chirar. Leyié en internet que bell u bella afortunada heba ganau no sé quántos millons d'euros en bella lotería aquí, en Zaragoza. Se m'afinca lo café y las birostas untaciadas; lo que podría fer con totz ixos chanfles...

Pillé la bicicleta y empecipié lo mío viache enta lo treballo. La rutina se crebó a los quince minutos. No, no consiguié cruzar lo famoso semaforo en verde, pero aguardando-ie, bella persona no i yera. ¿Qué heba pasau con o vendendor de moquers? No deixé de pensar-ie, asinas como tampoco no podeba deixar de pensar en a chent que gana tantos diners en a lotería. Si los hese ganaus, ya habría pretau fuego a este puesto de treballo de mierda, pero...

Los días pasaban, y lo vendedor no feba acto de presencia. Pensé que s'heba cambiau de zona, no m'hese almirau que s'hese visto atacau por la mía propuesta, u talment yera malaudo, s'heba enmorgallau... encara que no pareixeba lo tipo de persona que albandonase tant facil.

Decidié de recorrer la ciudat buscando-lo, pero no saqué treslada. ¿Por qué esta baruca? No l'entendeba, talment la mía aburrida vida, talment o deseyo d'intercambiar experiencias vitals con atras personas, que cada vez se me feba mas y mas complicau...

A qüestión ye que china-chana fue tornando t'a normalidat, por decir-lo de bella forma y empecipié una nueva semana con o mesmo ritual capitalista alienant de siempre. Pero unatra vez plegué en o famoso semaforo de Puerta d'o Carmen en royo (lo destín no me permite nian ixa chicota victoria) y fue abordada por un mesache.
- Disculpe, esto ye pa vusté – mientres me daba un sobre amarillenco bien recio.
- Ehh, quí yes? - pregunté entre espantada y curiosa. 

- Me ninvia un amigo – contestó aluenyando-se.

Fiqué lo sobre en a mochila y continué tot lo viache sin saber qué sería. Lo xaringazo d'adrenalina y quemesió qué mas que le foteba a lo mío sistema niervoso esta situación fació que me negase a ubrir lo sobre en o treballo, mas parando cuenta en o nuevo, pa variar, aburriu día allí. Pensé en todas las opcions y en quí me l'habría ninviau. D'astí salioron las historias mas absurdas y inquietants. Acabada la chornada laboral, lo traquetiau d'o corazón indicaba que iba a esclatar, que amenistaba plegar en casa.

Ya en casa, me saqué la ropa de salir, me miré enta cada cabo d'a casa y procedié a ubrir lo paquet con anglucia. “Timisoara'89” meteba en un paquet de fuellas escritas a man. Una nota reclamó la mía atención: “Ciclista curiosa y anonima, desconoixco qué pasaba mientres este tiempo por la tuya cabeza mientres me mirabas cada vez que nos trobabanos en o semaforo, pero a fe a fe que esto te satisfará, una historia real de poca suerte, pero se conoixe que, con a-saber-la fortuna l'aire ha cambiau, y o rumbo tamién. Los míos millors deseyos”.

Por fin sabié d'o vendedor de moquers. Y tanto, pero tanto... Tot lo que me preguntaba, astí yera escrito, un tresoro que pa qualsiquiera no tendría importancia, pero que a yo m'ubrió una nueva finestra. No tardé ni quarto ni cosa en devorar lo escrito y en fer-me con as suyas vivencias d'a Rumanía dimpués d'a caita d'o socialismo, y tamién con a forzosa plegada en estas tierras. Pero la fortuna a la fin fació la riseta... Mientres torno a pedaleyar enta un treballo de mierda en una ciudat de mierda en un sistema de mierda rodiada de muita chent de mierda... Talment a combinación ganadera tamién me visite un día.

The Black Sheep

The bridge

Lo sol se filtraba por la persiana. Los uellos royos por dormir pocas horas, lo cuerpo doblau y enrebullau entre los linzuelos, las mantas...

- No, no quiero - pensaba Paula mientres prebaba de sobatir-se la cansera estiraciando-se en a cama.

Mientres se vestiba, se miraba la caixa de Trankimazín que teneba en a taula chunto a la cama.

- Estoi que hue me'n foteré una pindola, amenisto dormir. Me dispertaré igual d'atrallada, pero... – se pensaba entre que se lavaba la cara y s'ateclaba las cerras.

Paula no feba pacha con os medicamentos que le proporcionaba la psiquiatra, se sentiba remallada y dormida mientres tot lo día, amás que deciba que no le deixaban estar ella mesma (como si dimpués de dos meses hese estau ella mesma en bell momento).

La muerte de su pai en o treballo (treballo – muerte, muerte - treballo), y la de su mai, muit poco tiempo dimpués por un cancer de peito con masiada prisa (como los conellos blancos d'Alicia que conducen los autobuses) acabó minchando-se lo poco que le quedaba a Paula alavez. Ella consideraba que si su pai no hese muerto, su mai habría puesto superar la malotía. Fuese como fuese, agora Paula feba cara a los suyos vinte anyos, a un present en que ha habiu d'abandonar la suya carrera en a universidat. Con a beca denegada y sin un refirme economico (a resta d'a familia que le quedaba no podeba asegurar-le-ne), habió de mirar un treballo, precario y que odiaba, pero que no le feba honra pa poder continuar chugando con transistors NPN, MOSFET ni diodos LED.

Yera lunes, pero ixe día teneba descanso. A Paula no le feba mica goyo lo suyo treballo en o bar, en a terraza, pero yera la unica forma d'empecipiar una nueva vida sin sus pais. Este lunes, como atros, corrió desesperada a fer cosa. Yera chitada en a cama d'a que acababa de levantar-se, doblada. Se miraba lo teito. Cinco, diez minutos dimpués, leyeba como as atras cincocientas vegadas la carta de despedida de su mai. Talment lo feba pa tornar a fer como totz os días un analisi serio d'a suya vida esparatada dividida entre lo treballo, la depresión, la ansiedat y la procastinación, lo suyo esporte favorito. Alentar, mirar-se lo teito y aguardar que lo mundo s'acabe. Feba poco caso a las voces que le pediban que salise de casa, con os suyos amigos. La sincusa d'a medicación, que le sacaba las ganas de tot, siempre yera penchada en a suya cabeza dica que cayeba ta la suya boca.

Reunió fuerzas y tornó a levantar-se pa almorzar. Cereals, leit, birostas. A Paula le reconfortaba lo soniu d'o cochillo sobre las birostas torradas. Pensaba en cómo sería lo soniu d'ixe cochillo tallando la piel, las arterias, los musclos d'o cuello d'o suyo chefe. Por cada mirada lasciva, por cada roce d'as suyas mans en o suyo culo, en as suyas garras, por cada comentario baboso, por cada menaza laboral velada... ¿quántas punyaladas ferían falta pa resarcir-se-ne?

- Baboso faixista... - comentó Paula a nengún mientres se disposaba a mosegar las birostas.

Acabó lo suyo almuerzo y tornó a posar-se en a cama. Se miró unatra vegada la carta dende luent mientres se funiban las sensacions d'o suyo arredol a monico. Se chitó, se miró lo teito, esporte personal, y dimpués de bell minuto, s'incorporó de momento. S'espulló, se vistió pa salir de casa, agafó las claus, pilló la bicicleta y salió de casa.

Trencando las buegas d'a suya voluntat, fue dondiando por la ciudat, plena arrienda de tot tipo de chent, con prisa, u disfrutando d'una tranquilidat mega y momentania. Paula nunca no heba teniu una concepción d'as personas dolenta, por decir-lo asinas, pero cada vegada yera mas conscient d'o lau perverso d'o ser humano.

- Tot lo mundo quiere aprofitar-se de tot lo mundo, gosa haber-ie intencions amagadas – pensaba mientres enfilaba ta lo Puent de Piedra.

Aquí se'n baixó d'a bicicleta y se disposó a viyer lo río, que baixaba con tasa augua pa ixa epoca de l'anyo. Se metió los auriculars y empecipió a sentir la musica. ¿Lo reggae le inspiraría a tener un día lucido por fin? Aturó en frent d'o famoso pozo de Sant Lazaro. Irrumpió en a suya cabeza l'autobús que i cayó dende lo mesmo punto a on yera y la trachedia que escayeixió. Pensó en cómo sería sumerchir-se-ie, ¿qué i habría? Talment acabase en Tortosa, succionada como si nengún le dase a la cadena d'a privada y apareixiese allí, por arte de machia. U talment acabase devorada por sirulos, u talment bella fantasma le impediría salir ta la superficie...

- Masiada imachinación, pero... - sabeba la cantidat de suicidios en as suyas fondas auguas. - Talment i haiga una pila de crapacins aguardando-ie a que les faigan caso – pensó a la fin.

Lo puent siempre le heba clamau l'atención, le pareixeba especial, quasi machico. ¿Por qué? Lo pozo, los lions en as entradas d'o puent, las antigas casas que i heba... tamién teneba conexión con sus pais, lo cansa que siempre yera con ells pa poder ir a viyer-lo, a pasar por ell... podría estar-se-ie horas allí mirando-se la no-cosa. Pero desligó la suya mirada d'o pozo y se disposó a continuar enta l'atra entrada d'o puent. Feba un día graso. Pensó en agradeixer l'interés d'os suyos amigos fendo un poder pa quedar con ells en ixe maitín, pero no obtenió las respuestas adequadas.

Pensó en tornar ta casa, pero sabeba que si i tornaba, no'n saldría, asinas que se rebeló contra lo suyo yo que la manipoliaba como una monyaca de titers y s'acercó a bell establimiento d'alimentación... pa fer-se con una biera. Prou que dimpués con unatra, y con unatra. En rabiaba a-saber-lo d'a biera, encara que l'alcohol lo teneba prohibiu por la psiquiatra. Pero no solo iba a alimentar-se d'hordio. Rechiró la suya pocha, en os pantalons pretos, y i trobó mas diners.

- Cal chentar – afirmó caramocana, endrezando-se cara ta las carreras de dezaga d'a Seu pa trobar bell puesto en que plenar las visceras de l'abdomen.

En acabar de chentar y de fer un poquet la dichestión, pensó que ir-se-ne a baixar la chenta sería una buena ideya. Pensó en visitar lo camín que plega en o galacho de l'Alfranca, u lo de Chuslivol, que de cutio gosaba recorrer con su pai.

- ¡A muyir cardelinas! - pensó mientres se miraba fito-fito las ruedas d'a suya bicicleta de carretera.

Pilló lo carril bici d'Echegaray y Caballero dica que acabó y encomenzó lo camín ta l'Alfranca, esta vegada sin la companyía de su pai. Se metió los cascos y se metió a escuitar musica mientres pedaleyaba y paraba cuenta en o río Ebro y las suyas curiosidatz, mechanas y sotos. Pareixeba que bell rayo de sol se filtraba en a suya depresión, en a suya inestabilidat emocional.

A la fin aconsiguió respuesta en bella amiga. De tardes quedaría con ella. Sabeba a punto fixo que iban a zorruspar. Tamién sabeba que no iba a tomar las pindolas. Ya en a chenta las heba deixadas olbidadas en l'ostracismo. Quedoron en un bar por la Madalena, a fer-se-ie bell gotet.

- Bueno, ¿y cómo va? Ya feba semanas que no te viyeba. Cal que salgas mas... - dició l'amiga.

- Pos aquí me veyes, esfumarriando en una terraza...

- Y zorrupiando... no lo tiens vedau?

- No, no voi mal...

- Ya veigo – contesta con poca convicción l'amiga.

- Bueno, ¿brindamos?

- Claro. Por nusatras – y facioron trucar los suyos vasos.

Fendo la parola, y bella biera mas dimpués, se fació quasi la hora de cenar. Se despidioron pa unatra vegada y cadaguna fue ta casa suya. Cómo no, Paula atravesó lo Puent de Piedra, amorosiando las piedras a lo suyo paso.

Arribó ta casa, cenó y se disposó a dormir, esta vegada con cierta calma, a pesar de que heba de treballar en a maldita terraza a l'atro'l día. Pero sobre la una d'a nueit, bella cosa fació que Paula despertase d'o suyo suenio. Se levantó como poseída por bell esprito, se vistió, pilló la bicicleta y espipó de casa. Pedaleyó tant fuerte que la sabor a arambre le engaronó la boca. Apareixió por lo Puent de Piedra y s'estió en a metat, mirando-se enta lo Puent de Fierro. Yera d'aforro, con una camiseta de manga curta y una camisa a quadros encima. No i heba personas arredol. Fació morisquetas a las piedras mientres zarraba los uellos. Un buen rato s'estió asinas, recullindo la ulor que tot lo conchunto feba, imachinando...

No i heba vida allí. Aventó las pindolas d'a suya psiquiatra enta lo río y se'n puyó en l'alto d'as piedras firmes d'o puent. Se miró enta abaixo, enta lo frent. Estiró los brazos, zarró los uellos. Inspiró y se'n fació la rialleta...

The Black Sheep