El soniu del chapotón de l'augua va estar seguiu d'una fonda expresión de pena. La bandera roya se va devantar y es apalusos van seguir dispués. El zaguer participant yera flotando inconscient en l'augua de la cala. Buceadors van yir en aduya de l'hombre y el van quitar ta la superficie. Heba teniu suerte. Teneba qualques uesos trencaus. Atras participants no heban aconsiguiu sobrevivir, encara que no'n moriba guaires per un regular.
La chicota cala, con un publico muit animau, yera de bit a bot. 4.597 participants d'arredol de la galaxia, pero mas que mas del planeta local, Setyp, participaban en el concurso anual de doma del seyk, que yera un peix chigant que viviba per astí, que heba puesto estar capturau y con el que agora qualcuns feban negocio. Yera un espectaclo famoso. Cada participant se'n puyaba encima de l'animal, con una escafandra que les permitiba respirar baixo l'augua, y prebaba de domar-lo, el qual nunca no ocurriba. Como yera bien dificil domar al seyk, ganaba qui yera mas tiempo amontau en el peix.
No i heba sorpresas estianyo, como atros, y el favorito, T. Grynhuib, participant local, yera ganando con autoridat, con un tiempo de 5 minutos 42 segundos. El segundo no heba puesto estomagar que 2:09. El publico no paraba de chilar el nombre de Grynhuib. Quedaba pocos participants. El turno yera agora ta una moceta d'uns once u dotze anyos. No se i veyeba participants tant chovens, pero las reglas no especificaban cosa en contra, asinas que, es organizadors no van poder negar-le-ie la participación, encara que le van alvertir de las posibles conseqüencias. La moceta pareixeba que i heba acudiu sola. Ni bayo de familiars u d'atras personas que podesen fer-se-ne cargo.
Un comercial d'una funeraria i heba acudiu y yera prenendo midas de la zagaleta. Trache y chapeu negros, fendo-se-ne la rialleta, sabedor de que teneba una mas que posible nueva clienta. La nina, que heba sinyau la suya participación con una X, sin nombres, se meteba la escafandra.
- Qué ganas tien de morir, si apenas ha viviu - pensaba un d'es organizadors en veyer-la presta ta participar.
- Bien, si ye presta, devanto la bandera blanca y que salte - va fer una chueza.
El seyk yera debaixo aguardando a que la siguient participant saltase encima del lomo. L'animal, como siempre, yera bien foricón. La moceta va declinar meter-se el casco de la escafandra, deixando a tot el mundo alumbrau debant de tal temeridat.
- Esto no ye un chuego - va decir la chueza de la bandera a la nina, con voz aspra y el cenyo muit serioso, mientres el chuez que mediba el tiempo se las miraba caricacho.
La moza va mirar-se enta abaixo. La bandera blanca va estar hizada. Va fer un blinco y va cayer en el lomo del seyk. Este, en sentir la presión de la zagaleta en el lomo va sumerchir-se tot guito. El peix esbatuquiaba en l'augua, prebando de limpiar-se-ne de la moza. Esta, s'heba agarrapizau a l'aleta dorsal del seyk. L'animal va puyar enta la superficie y va fer un gran blinco en l'aire. El seyk, que no gosaba parlar, va fer:
- ¿Una nina? ¿Como t'atrives? ¿Ye que yes loca? No te pienses que per estar tant choven voi a deixar-te ganar u mesmo vivir.
El peix va cayer a toda vitesa violentament en l'augua con el silencio como respuesta de la moceta. Silencio que tamién yera present en el publico.
Dispués de qualques segundos, el seyk va tornar a amaneixer en l'aire con unatro blinco. Ta sorpresa de tot el mundo, seyk incluyiu, la zagala seguiba agarrapizada a l'aleta dorsal, como si hese clavau las mans en ella.
- ¿Como que no cayes? Solta las mans y te deixaré vivir, ¡insensata! No vas a ganar - va decir el peix mientres feba pintacodas en l'aire a qualques metros de l'augua.
- No he veniu aquí ni a ganar ni a perder, seyk - va decir per fin la zagala con aire de solemnidat.
- Definitivament yes una autentica fabas - va sentenciar el peix.
Es dos van cayer dentro de l'augua marina de la cala zarrada. Tres linias a cada lau van ubrir-se en el cuello de la zagala, a modo de ganyas. Un soniu extranyo y imperceptible a's oyius del resto de personas presents en la cala va salir de la zagala, baixo l'augua. El seyk se sobateba en l'augua fendo cullebretas ta vencer en la batalla que yera tenendo con la nina. Va sentir el soniu emitiu per ella y el va entender. Palabras d'un viello y olvidau idioma.
- ¿A on has aprendiu ixo? - va preguntar el peix, enarcau, mientres feba pintacodas en l'aire unatra vez.
- ¿A on? Tu l'habrías de saber. Pareix que l'entiendes, ¿verdat? - va contestar la zagala.
- Tu... ¿Quí yes? ¿Qué quiers? - va fer el seyk con la voz tremoladera.
Unatra vez van cayer a l'augua. Una melodía, unatra vez en ixa viella lengua, va sonar. El seyk yera per cada segundo mas aturrullau mientres pillaba vencida ta blincar fuera de l'augua una vez mas.
- He feto un largo viache ta poder dar esperanza al mío pueblo. No les feré burro falso - va fer la nina, solemne.
- Si ye verdat el que dices... ixe pueblo del que parlas ya no existe, van estar acotolaus, mentirola - va contestar el seyk fendo una vuelta sobre sí mesmo mientres la zagaleta seguiba sin soltar-se-ne, de l'aleta.
- ¿Acotolaus? No nos vom acotolar, nos vom mezclar. Vom despareixer a's suyos uellos, pero vom seguir vivos, mezclaus con ells. Vom estar descabezaus, van estar tiempos prou duros, ixo ye el que contan es míos antipasaus. Vom perder al nuestro rei, pero no vom perder la suya linia de sucesión - va explicar la nina mientres l'augua le zapotiaba el rostro amanada a cayer dentro de l'augua marina unatra vez mas, agarrapizada al seyk.
El seyk va baixar prou y va pillar buena vencida ta saltar.
- Ixo no ye el que diz la historia - va protestar el seyk.
- La historia la escriben es vencedors - va responder la nina - Y es vencius hem trobau una forma de reescribir-la y recuperar el que ye nuestro. Hem trobau un filo que conduce al nuestro rei y l'hem trobau, machestat - va fer la moceta con firmeza.
El peix va cayer a l'augua, pero no chapurquiaba ya, no sabeba qué fer. El publico no entendeba qué yera pasando en l'augua.
- Yo soi un seyk, no un tyek, ¿cómo puetz decir que yo soi el vuestro rei? Si ye bella tactica ta ganar, te mataré - va respuliar el peix.
- Ya te l'he dito, nos vom mezclar ta sobrevivir. Van crabutar al nuestro rei, pero la suya linia reyal, la que va poder sobrevivir, tamién se va mezclar ta sobrevivir. Tot se va olbidar, pero a la fin la verdat sale a la superficie. ¿Qué mas nos da que sigas un seyk u el que sigas? Conoixes a punto fixo cómo ye la nuestra cultura y el nuestro idioma, pos asinas vas estar criau antes d'estar capturau. Capturau per es mesmos que van destruir al nuestro pueblo, al nuestro país. ¿No creyes que ye el momento de la venganza? - va sentenciar la nina.
El seyk va estar pensaroso mientres el publico chilaba emocionau. La bandera blanca va tornar a hizar-se. Ixa nina heba puesto domar al monstroso animal. T. Grynhuib, que yera ganando basta ixe momento va ronyar a-saber-lo, soltando prous insultos enta la zagala y fotendo punyazos a l'aire.
- Bueno, ¿y cómo escaparé d'aquí? Esta cala ye zarrada con un muro transparent d'un material que ni una bomba ye capable nian d'esportillar - va comentar el seyk mientres tornaba a fundir-se en l'augua.
La moceta va recitar una especie d'esconchuro en ixa luenga olbidada que solo ells entendeban. El seyk va entrar en trance. Es uellos se van meter de tot blancos. Va ubrir la boca en dirección al muro transparent y va soltar un rayo d'extrema potencia que va regalar buena parte del muro en pocos segundos. El publico va chilar espantau mientres el seyk y la zagala tornaban a volar per l'aire en una pintacoda.
- ¡VENGANZA! - van chilar es dos de vez mientres tornaban a cayer en l'augua y escapaban de la cala enta mar ubierto, enfilando, a tot meter, enta el suyo país perdiu.