The fog

Quan va despertar d'unatra terrible soniadera, yeran unatra vez astí. Alufrando, mirando respuestas que nomás podeban estar al suyo cap. En el quarto s'alentaba un ambient aseptico, como si el tiempo s'hese parau, como si estase aguardando una eterna cirurchía en el limbo. Es "cirurchanos", que nunca no'n saliban, yeran prestos ta unatra "operación". Se van sacar es chapeus d'entre las suyas largas orellas de cunils. Yeran alters y bien farchaus con gambeto griso. Alentaban como fendo un poder per ixolomar aquello que miraban.

Dimpués de bell minuto d'espera, de miradas inquisitivas, es inspectors van parlar:

- Buena tarde. No querebam tabarriar unatra vez, pero como comprenderá, nos fa falta la suya información ta saber bien l'augua clara. ¿Ya recorda cosa? - deciba un d'es tipos mientres sosteneba el chapeu con las mans y tarrabaciaba con la mirada.

- Yo... yo... no sé... aquí no trobarán respuestas, ya el saben. No'n puedo mas, no... - deciba mientres s'ixugaba las glarimas con las mans y con la voz trencada. 

La cama se le feba a saber qué gran, cada día que pasaba allí pareixeba que se fundiba poquet a poquet y que bell día no podría estar capable de devantar-se-ne, si ye que ixo diba a poder estar bella vez.

- Au, vienga, ya sabe que ye important. Faya un poder, necesitam saber qué va pasar en ixe bosque, perqué el suyo companyero va amaneixer esterzoniau y con es bodiellos fuera. El va veyer, ha de recordar. Al menos prebe de no resistir-se a l'acción d'es farmacos y de las maquinas - va fer l'atro policía que no parlaba guaire nunca y que teneba las orellas pardas y mas tiesas.

- Yo no me resisto, ¿cómo voi a haber de decir-lo? NO PUEDO RECORDAR IXO. Deixen-me estar, me fa miedo.

- No querem fer la tana, sabem que ha habiu de pasar per bella cosa terrible, pero... per favor, faya memoria.

Va zarrar es uellos y va prebar de meter imachens a toda ixa scena en negro, pero acababa como siempre el feba quan iba ta ixa zona del suyo cerebro. El viyeba entre la nieu, embolicau en sangre, con es bodiellos fuera, con la mirada blanquinyosa mirando-se enta l'infinito. La respiración acceleraba, anguniosa, mientres la cerola tornaba a invadir tot el suyo cuerpo. Al suyo cap veniba la boira preta, ixa boira preta que l'afogaba tot.

La cama tremolaba entre es esbrunces y es chilos de terror. Es cables y sondas que uniban el suyo cuerpo a es goters y maquinas se sobateban y cayeban a tierra. El serol de las maquinas en perder sinyal va fer entrar qualques personas con uniforme sanitario, azul, blanco...

- No podem tornar a conectar tot esto asinas - deciba una medica mientres se tocatiaba las mostaixas.

- L'atra vez que fue a acercar-me a la cama asinas quasi me trenca el maniquiello - deciba un enfermer mientres se miraba a una tercera persona que sosteneba una pistola. Dos disparos, dos dardos invisibles que van entrar al cuerpo sin deixar-ne bayo.

- NO'L SÉ, LA BOIRA, LA BOIRA EL VA FER, NO SÉ, LA BOIRA M'INVADE, YO... - va fer mientres china-chana es tranquilizants feban el suyo troballo al suyo cuerpo.

Va cayer, unatra vez sobre la cama, con es uellos perdius, plens de zocega, mirando-se fito-fito el teito. El personal sanitario feba limpio esfuerzo en reconectar totz es cables y sondas al suyo cuerpo mientres es policías se miraban la scena. Un babaízo le va amaneixer cayendo per la suya boca mientres repetiba "boira, boira...", ya inerte.

- Comprenderán sinyors achents que no pueden estar aquí agora.

- Sí, claro, ya i tornarem unatro día.

Quan va despertar d'unatra terrible soniadera, yeran unatra vez astí. Alufrando, mirando respuestas que nomás podeban estar al suyo cap. En el quarto s'alentaba un ambient aseptico, como si el tiempo s'hese parau, como si estase aguardando una eterna cirurchía en el limbo. Es "cirurchanos", que nunca no'n saliban, yeran prestos ta unatra "operación". Se van sacar es chapeus d'entre las suyas largas orellas de cunils. Yeran alters y bien farchaus con gambeto griso. Alentaban como fendo un poder per ixolomar aquello que miraban...

The Black Sheep