La soledat d'el corredor de fondo

Dimpués de cursas exitosas con la bici enta Cambridge y Ely planifiqué bella ruta mas ta'l que queda de verano. Aquí en Reino Uniu regular que luego empecipie a plever mas y faya mas fredor, asinas que cal aproveitar en estas semanas antes de l'agüerro. Pensé en veyer el mar, asinas que me miré cómo arribar dende Ely ta Cromer, un lugar de la costa de Norfolk, en una cursa de bels 125 km alto u baixo planos, indo en tren ta Ely y unatra vez en tren dende Cromer ta casa. Pensé en fer-la este cabo de semana ya pasau, pero habié de prolargar-la perque el sabado i heba vaga de trens (prou habituals dende fa meses) y el dominche i heba troballos de mantenimiento en la linia, asinas que en bel punto caleba cambiar a autobús, y no i deixan ficar bicicletas. Per tanto, el decidié deixar ta belatro cabo de semana que tienga libre.

Tamién pensé en ir ta Londres, ida y tornada (bels 130 km). No soi feto a estes kilometraches tant largos, asinas que no sé si será buena ideya, pero cuento que bebendo y minchando bien, no debería de haber-ie problema. Con tot, si las fuerzas no acompanyan, podrí pillar el tren. Ta ir enta Londres planeyo pillar la ruta ciclista nacional 12 (no arriba a Londres pero se queda cerca). Y como ahiere no podebe fer atra cosa que ir y tornar en bici, decidié d'explorar un poquet ta cuan decida d'ir-ie. Asinas que pensé en ir ta Potters Bar, ida y tornada (bels 80 km).

Yere aguardando con impaciencia el momento en que podese pillar la bici y sentir-me libre, asinas que en tenebe prous ganas. Soi tenendo días complicaus dende fa bella semana. He teniu picos d'ansiedat, mas que mas pe'l troballo y decidié de medicar-me con bella pindola de valeriana que me funciona bien. Dende fa tiempo siento que son salindo-me cosas dende el mío interior que realment conoixebe pero que ignorabe, y mental y emocionalment voi enta baixo. 

Asinas que amenistabe pillar la bici ta escoscar-me bel poquet pero tamién me feba miedo de disociar (u el que siga, no sé si ye el termen correcto ta cuan empecipias a pensar y pensar en cosas y metes el tuyo cerebro en piloto automatico) y empecipiar a pensar en ixas cosas que me yeran rosigando mientres pedaleyabe y meter-me pior. Y efectivament, asinas fue. Con tot, se me fa que tampoco no me fayó mal pensar-ie.

Conoixebe la ruta, hebe iu ta Stevenage, Knebworth u Welwyn cualques veces, asinas que no tenié mas problema. Iba bien, con fuerza. L'orache yera bueno. Ciclistas iba y veniba per ixa ruta, mas estando dominche y con un luns que yera festivo. Paré ta minchar cualcosa y beber en un chicot parque natural; no goso parar guaire ni muito tiempo. No tenebe guaire virolla, considerabe que yera prou con cualques bolsas de panizo y un platano, como de cutio, perque no goso fer salidas largas. 

Salindo de Welwyn enfilé enta Hatfield, que yera la ciudat mas luent anque hebe estau en ixa ruta; asinas que no sabebe el que veyerí dimpués. Y aquí ya las boiras se metión negras. Siguié es sinyals que m'indicaban el camín per la ruta 12 pero en bel punto de Hatfield me cacegué. ¿Án yere? No'l sabebe. Yere dando vueltas a'l mesmo punto en una zona residencial con las carreras sin salida y ixo me gosaba mal. Torné a'l zaguer sinyal que viyé y dimpués de no pocos intentos creyé veyer la luz chusto antes d'abandonar. Y la luz pareixeba haber estau en frent de'l mío nas tot el rato. I heba una entrada a una chicota reserva natural que no hebe visto. Y enta allá endrecé. Pero con tot y con ixo, seguiba sin amaneixer sinyals. La reserva no seguiba guaire rato, uns pocos metros y pareixeba tornar la civilización. 

Garra sinyal en garra puesto. Asinas que farto de tot y ta que la mía frustración d'estar tant cerca y tant luent de vez no fuese a mas, decidié d'abandonar. En ixe momento empecipiaba a plever, no guaire, pero pleveba. Las boiras yeran de tot negras y la luz que antes l'engaronaba tot, yera amortada, como si caminasem enta la nuet total, como el mío estau d'animo. En ixe momento torné, dudé bella vez en tornar t'an hebe abandonau la ruta y explorar, pero pese a cierta duda, la mía decisión fue firme y me disposé a recorrer el camín de tornada.

Las sensacions de la primer parte de la ruta se'n vayón. El mío cerebro se desenchegó y se'n fayó la minchanga. El mío cuerpo cedió, empecipió a cansar-se mas y mas. Ibe sin ganas. Mesmo la mía postura sobre la bicicleta cambió, estando mas acorcovau, fendo-me mal tanto la espalda como el cuello, en el que sentibe prou tensión.

Sem fetos a la gloria en el ciclismo, pero tamién a'l fracaso sobre la bicicleta. Mientres que en anteriors rutas hebe disfrutau de la gloria, esta vez tocaba veyer l'atra cara fosca. La soledat sobre las dos ruedas puede estar dura. Y en ye. Soi conscient que si hese estau acompanyau, cal que hesem resuelto el problema d'orientación que tenié, que m'hese sentiu refirmau y no hese caito en las tenebras. No hese pasau cosa. Y si hese pasau, biesé que no m'hese enfondau. Y asinas con la bici como con la vida. Sin duda estar en un país extrancher dende fa anyos sin guaires posibilidaz de fer amistaz (per muito que i haiga chent que pueda alumbrar-se con este feto) fa que cada vez sigas mas solenco, perque allá an que perteneixebes vas perdendo chent, perque la distancia no perdona.

Y la ruta, con una mica de pluya, las garras prou pesadas y la espalda acorcovada como si estase emparando toz es problemas que me saliban de dentro, acabó. Bels 65 km, que ye prou bien, pero en la mía opinión, prou amargos. La siguient ruta cal que en dos semanas, si tot acompanya y me veigo con fuerzas, el mar aguarda. Toca cudiar-se, contra tot.

The harsh winter

Contaba con poca edat,

poca experiencia,

cuan lo hibierno arribó.

Arribó y arrasó lo sol,

arrasó a luna y as estrelas.

Cuenta a ciencia

que os hibiernos duran tres meses.

Sinyors de bata blanca

que no paran cuenta

que o tiempo ye relativo,

que tres meses en a suya galaxia

son tres decenios en a mía.

No recuerdo ixe día

pero sí que recuerdo

que a sangre se me cheló,

y as glarimas fuoron

l'unico calient que conservé.

Primo y cerenyo,

nunca no me i facié

a las boiras baixas,

a la nieu,

a o cierzo,

a portar siempre

un gambeto en o corazón

en casa,

en a escuela,

en o treballo,

en as carreras,

entre os tuyos besos.

Resistir ye vencer

nomás si aproveitas

as oportunidaz de contraatacar.

The lonely knight

He estau mirando-me viellos textos que hebe escrito y esta poesía (ni atros textos) no la recordaba. Yera un esbruixallo en un viello cuaderno pero he decidiu de recuperar-la. Regular que prebe d'escribir-ne mas de poesías, pero no aseguro que me salgan bien perque no tiengo mica inspiración ta la poesía en este momento. Tamién pienso de fer bella cosa con estes textos. Ya tiengo un fanzine pendient dende fa a-saber-lo. Fer-ne unatro el veigo de tot inviable, no tiengo tiempo, pero me ferí goi que no se quedasen es míos poemas pudrindo-se en bel caixón.

Game over

El brilo de la pantalla engaronaba las suyas ninetas, tristas, pero con rasmia. Tremolaban es pensamientos pe'l suyo cerebro. Tremolaban, asinas como las suyas mans, suaus, es suyos trastes en esta aventura. Illyana aguardaba dezaga de la pantalla las suyas instruccions. Heba de decir-le cómo empecipiar l'aventura, ta an heba de mover-se, con quí heba de charrar, qué heba de fer servir y cómo, con quí y cómo heba de peleyar u mesmo a quí heba de crabutar, entre atras accions u decisions. Pero ella, la chugadora, no teneba tantas posibilidaz d'elección. Nomás podeba ganar u ganar. Sabeba que si perdeba, el suyo obchetivo s'esturrufiaría, y mesmo podría significar la suya fin.

No i heba mas opcions, el sabeba, si n'i hese, no sería posada en ixa silla, comoda pero de pura tortura, prenendo decisions arrienda sobre un personache que si existise cal que tampoco no luitaría per ella. 

Yera la hora de mover-se, de decidir, d'actuar. El tiempo pasaba, encara que no i heba un tiempo limite. Pero feba falta dar espectaclo. Si daba espectaclo, teneba mas oportunidaz que toda ixa vilanía de pixautos aburrius le engraciasen con vidas extra y asinas poder tener millor posibilidaz d'arribar ta la fin d'el chuego. La chugadora heba d'acabar el chuego, de punta ta coda. Chugaba en modo muerte permanent: si Illyana moriba tenendo zero vidas extra, la suya participación acabaría abruptament, per ixo la importancia de tener vidas extra ta salvar-la en caso de perder en bel momento. Como no heba teniu guaire publicidat, garra espectador le heba dau vidas extra, asinas que empecipiaba con el marcador mirando-se enta l'abiso.

Cada acción, cada movimiento, cada vez que heba de redotar a bel enemigo pensaba en él, el porqué yera an yera, el suyo chirmán y el mal minchador que el devoraba sin parar. No teneba que una zaguer oportunidat y heba d'aprofitar-la. No teneba perras ta poder curar-le, en un mundo despiadau que s'espaldaba per cada día mas en un parque tematico de ricos, asinas que a la fin va recurrir a la suya zaguer esperanza y va trucar a la puerta de bel programa ta entretener a la clase alta ta aconseguir es diners que le feban falta. No va estar fácil entrar-ie, pero el va fer.

Las glarimas correban pe's suyos tefles, mas que mas cuan el suyo personache heba d'acabar a tiros con es enemigos, pasando per la suya memoria el momento cuan un guardia de seguridat va disparar y va matar a la suya mai cuan yeran prebando de rapar productos basicos ta sobrevivir, en un supermercau del barrio an que viviban. El guardia nian va estar procesau per homicidio. "La propiedat privada siempre per dencima de la vida de las personas", va pensar con rabia. El suyo pai tampoco no yera con éls, muerto cuan va cayer mientres le obligaban a cruixir la lei de la gravedat en bella obra. "Tot per bel chandrío inutil que cualque rico yera fendo ta plenar-se encara mas las pochas", pensaba mientres la ira le plenaba tot el sistema circulatorio.

Cal que ixas glarimas y ixa rabia yeran de l'agrau de bel espectador, que tot veyendo la dificultat con la que empecipiaba a esgarrabillar-se la chugadora, heba donau bella vida extra. A surbez yiba bebendo l'augua que teneba a man mientres Illyana feba cara a cualques naus espacials. Con el "canyón vulcano", rayos lasers y mesmo bel misil va acabar con todas las naus que le vedaban el paso enta una ciudat emplazada en una ballena chigant de colors flotando per l'espacio.

Una chicota pausa. Es cables que la rodiaban en ixe cuarto zarrau con clau y candau la meteban niervosa. Luces vrioletas y rosadas aterrizaban pe'l suyo cuerpo. Teneba prous ganas de chilar, de chilar y d'albandonar, pero no podeba. Si albandonaba yera muerte segura, ta ella y ta'l suyo chirmán. Va tornar a'l chuego y va foter bel batán a bel personache mientres chilaba de rabia, una rabia que yiba cada segundo aumentando. L'espectaclo yiba a mas y a poquet aconsiguiba mas vidas extra.

Rodiada de toda mena de canabastras zombis, Illyana les estrucaciaba terne que terne, pero en yeran masiadas. La katana transparent que tallaba tot el que s'encertaba en el suyo camín no yera prou, le feba falta machia, pero encara no yera en la parte d'el chuego en que la podeba aconsiguir. Va perder un par de vidas, pero es espectadors se regalaban y le daban bella vida extra ta que continuase con este circo. Bel enfrentamiento extra en salir d'unas catacumbas la heba deixada muit fráchil de vida, pero no reblaba.

Heban pasau cualques horas, el cansancio s'amuntonaba en el suyo cuerpo. Ubriba la boca ta ficar-ie bella minchuza que dende el programa le heban presto, heba d'acabar-se el chuego sin parar. Va acorar tanto la virolla como la bebida, aguardando a que bel inchenio robotico tornase a dar-le-ne mas. El chuego yera en una cinematica mas larga con la que le vagaba de pensar en qué fer una vez alcanzase la victoria. Es diners cubrirían es gastos de la recuperación total d'el suyo chirmán, pero no n'i habría mas ta vivir dimpués. Pensaba en que regular que hese de mirar de troballar en bella mina ta quitar litio, arambre u cualsiquier atro mineral cada vez mas escaso ta construir todas las comodidaz de las que desfrutaba cada vez menos chent. Va aladiar es pensamientos d'el suyo cap, pretendendo centrar-se en la batalla que a la curta u a la larga empecipiaría debant d'es suyos uellos, heba de parar firme cuenta, no podeba espiguardar-se.

Con dos vidas extra empecipiaba la parte final, cuan Illyana se sacaba el modo incognito y empecipiaba a foter tiros. Es enemigos cayeban a cheta, pero no va poder privar que perdese una vida. "¡No! No puedo estar tant angruciosa, calma". Mormostiaba ta ella mesma de vez que agarripazaba el mando con el que maniaba el destín d'Illyana y es destins suyo y de la unica persona que le quedaba en la vida. Es espectadors se divertiban. En la nueva fase d'el chuego, yiba a haber de maniar a atros personaches aliaus, como el robot Cables, el gato Mostaixas u el raboso Foxy. Ara con machia, la chugadora escalaba es atributos y armas ta fer cara el mas difícil d'el chuego.

La chugadora yera escruixinada, cada segundo allí yera una pesada labaza que podría fer-la burniar. Una patacada de leds pareixeba chuzgar-la cada vez que titillaban en el chicot cuarto. Prebaba d'ignorar es estimulos ambientals, no quereba mas despistes. Una tongada de zombis va amaneixer en pantalla, menazando la suya supervivencia. Se i feba a cuatro zarpas ta no fer gatatumba. Ara con la suya espada machica sí podeba crabutar toz ixes zombis que les rodiaban. Las ninetas de la chugadora van agrandir-se ta veyer como el suyo personache se quedaba esterlo. Desorientada, va encertar-se con el chefe final en una gran sala. Yera un ánchel, ya le heba feto cara antes, pero no en la suya forma real y mas poderosa. Y dimpués de bel intercambio de trucos d'espada, en va perder unatra, de vida. La chugadora va tamboniar el mando contra la taula, fendo veyer toda la suya frustración. No le quedaba mas vidas extra. Es espectadors no pareixeban querer dar-ne mas, de vidas, perque creyeban que estar con la vida penchando d'un filo sería muito mas divertiu y emocionant. Tot se decidiría en un tres y no res.

No podeba fallar. La sudor le saliba per toz es poros d'el suyo cuerpo. El miedo tamién, pero no yera momento ta reblar. Heba visto cómo se comportaba l'enemigo, teneba es datos ta triunfar. La peleya yera larga, va perder muita vida y en va recuperar. L'ánchel yera a pocas de cayer, Illyana yera tenendo exito pero bella pintacoda y bel ataque que no heba visto antes la heban deixada con una salut fráchil. Es espectadors regular que s'estasen divertindo prou. 

L'ánchel va fer un ataque que ya conoixeba, el va pillar y el va foter un buen espadazo. Un píxel de vida, la victoria yera suya, alentaba aliviada. Nomás el golpe final. Un golpe eterno que no va arribar, per muito que la chugadora yera pretando toz es botons del mando, incredula. L'ánchel se va devantar y va foter un tanganazo mortal. Sin vidas extra, tot heba acabau. La victoria desapareixeba debant de la suya mirada. La chugadora chilaba, protestaba per que el mando no furrulaba, pero tot yera de baldes. 

Se sentiba cualque serol mecanico y electronico. Un brazo robotico va salir a'l canto d'ella, que se miraba entabant con es uellos cubiertos de glarimas. Trusquiba saliva. Un mensache en la pantalla preguntaba a's espectadors si la chugadora mereixeba salvar la vida u pe'l contrario, morir. Bel minutet ta votar y el resultau va salir, iluminando la pantalla. "El siento", va decir mirando-se de frent, resonando en el chicot cuarto.

The lonely knight

*Texto escrito seguindo la grafía oficial de l'aragonés aprebada per l'Academia Aragonesa de la Lengua.

Video killed the radio star

 "Video killed the radio star" sonaba en a radio mientres Isa devoraba lo suyo almuerzo. Se miraba enta la no-cosa, con a cabeza en qualsiquier atra parte, difuera d'a realidat. Yera encara luego, pero encara no se i heba feito a no amaitinar dimpués de perder lo suyo treballo.

La radio seguiba con o suyo soniquete. Unatra torrada, limpio mosegar y mastegar. Isa heba acorau el suyo almuerzo y se disposaba a deixar los platos en a fregadera pa fer fregote. Abstraída en os suyos pensamientos, bell atomo enchugardiu heba pretau a correr en as neuronas.

"Y acabamos recordando a Isabel Benítez Marías que, por favor, no pille lo coche hue". Ixas fuoron las palabras exactas que Isa sintió entrar por las suyas orellas enta los puestos mas reconditos d'as suyas neuronas y sinapsis, procedents d'a radio. Isabel Benítez Marías, Isa, deixó lo fregote con a boca ubierta en un cenyo d'incredulidat.

- Pero qué... - mormostió Isa con una voz que no pareixeba la suya. Pensó que bella persona le yera fendo una broma. No conoixeba a la locutora radiofonica, pero talment bella persona conoixida sí la conoixeba y quereba fer-le una chanza a traviés d'ella, no teneba guaire sentiu, pero... Con tot, tampoco no entendeba la broma, si en yera... "Agora soi una mica niervosa, talment la mía cabeza ye fendo-me-la buena una mica", pensó Isa.

A l'atro'l día, Isa tornó a levantar-se luego, porque no se sentiba comoda en a cama a pesar de no haber de fer cosa y ya no podeba dormir-se unatra vez. Fue enta la radio. La suya man se paró chusto antes d'enchegar-la, en un cenyo d'incredulidat y resistencia, pero tornó a mover-la pa que las ondas hertzianas tornasen a correr por l'aparato electronico. 

Isa tornó a repetir lo ritual de totz los maitins, mosegando y mastegando las suyas torradas. Esta vez, paró firme cuenta en o que la locutora iba decindo. Mastegando, trusquindo, bebindo, lo programa plegaba a la suya fin como cada día. "Y nos despedimos por hue, fendo-le alcordanza a Isabel Benítez Marías que no pille lo coche hue".

No podeba estar, unatra vez que sentiba ixo. Isa se metió un dido en a orella como prebando d'escoscar l'oyiu. Pareixeba que la sangre heba pretau a correr en retirada, albandonando la suya cara, quedó bufina de tot. Isa quedó immobil mientres minutos, con una litarrada de pensamientos a qual mas absurdo cruzando la suya cabeza. En una furnada, pilló lo telefono y trucó a la radio.

- Radio Aragón, ¿en qué puedo ayudar?

-Sí, sienta, ¿puedo parlar con Alejandra Márquez? - preguntó niervosa Isa.

- ¿De parte de quí?

- D'Isabel Benítez Marías, ella be de conoixer-me.

- Aguarde un inte, por favor.

"Video killed the radio star" como musica d'espera. Pasó un minuto, un minuto con o corazón en plena angunia, la sangre bulliba. Teneba cada niervol d'o cuerpo tant tenso que no podrían cortar-los ni con a mas esmolada espada. Por fin, una voz sonó a l'atro costau d'a linia, como si sonase dende mundiludiaple.

- Ola, ¿en qué puedo aduyar-la? - fació Alejandra, la locutora.

- A mirar, ¿cómo sabe lo mío nombre y por qué me diz que no pille lo coche totz los días? ¿Ye una broma? - preguntó niervosa Isa.

- ¿Perdón? ¿De qué me charra? - contestó Alejandra.

- ¿Cómo qué de qué? Pero si la siento totz los días decindo que no pille l'auto, a yo, nomás a yo. ¿Por qué? - Isa respondió con un tono mas encarranyau, mirando una respuesta lochica que no pareixeba existir.

- Sienta, suposo que s'ha entivocau, lo siento, no puedo aduyar-la - sentenció confundida Alejandra, la locutora.

En o telefono nomás se i sentiba lo "pipipi" contino d'a linia telefonica una vez heban penchau d'a radio. Isa teneba una sensación de rabia y frustración evidents, y en respuesta a esto y a lo suyo corazón traquetiando a velocidat supersonica, aventó lo telefono con ira enta la paret, ubrindo-se y salindo-se-ne la batería.

- Soi... soi bien, nomás ye lo estrés d'estes días, lo mío cerebro ye fendo-me-ne una, nomás ye ixo - se dició Isa ploriconiando.

Unatro día amaneixió. Isa no heba puesto dormir guaire y se levantó unatra vez de la cama. Se dirichió enta la radio. Se paró debant, con una mirada de miedo, rabia y fastio. En contra d'a suya voluntat, bella purneta blincó en as sinapsis d'o suyo cerebro y ordenó a la man que enchegase la radio. Unatra vez lo mesmo programa, la mesma locutora, lo mesmo ritual d'almuerzo.

Lo programa plegaba a la suya fin, en un ciclo que se repetiba día sin atro. Isa se miró fito-fito la radio, como si podese disparar rayos con os uellos. "Y recordamos unatro día más a Isabel Benítez Marías que no pille lo coche hue".

Isa chiló expulsando ira y miedo, fendo quasi tremolar mesmo los alazetz de l'edificio do viviba. No se lo pensó guaire, se vistió, pilló las claus d'o coche y espipó enta la radio.

Isa iba conducindo por la ciudat sin guaire paciencia, tremolando; podría vomecar lo suyo corazón de tantos niervols que yera pasando. No i deixaba de pensar, en ixas linias finals que la locutora pareixeba adedicar-le cada día en una mena de ritual malefico. 

S'acercaba a la radio, una manzana mas y i sería. Isa miraba aparcamiento do fuese. Isa iba masiau aprisa, muit niervosa. De momento, una figura amaneixió en chirar la curva. Isa frenó tot lo que le permitía lo pedal, como si querese atravesar l'auto con o piet. La figura tambonó lo parabrisas y salió aventada enta debat. Isa anguniada ubrió la puerta d'o coche con expresión de terror y fue a mirar con qué heba feito mas que contacto. L'auto teneba bell turón, la figura, por tierra, teneba bella cosa mas. Bell filo de sangre saliba d'a figura. Yera una muller. Quan vidó quí yera, Isa se levó las mans enta la suya cara bufina, con os suyos uellos a pocas de salir-se-ne. Por tierra vidó a Alejandra Márquez.

The lonely knight

The box

No se lo podeba creyer. Sabeba que no yera bien, que yera distant, pero no pensaba que iba a dar ixe paso. Se'n fue. Pa no tornar. Elisa teneba lo corazón endolorau. No querió estar-se masiau dimpués d'o funeral y espipó ta casa. Con tot, las glarimas no feban sulcos en los suyos caixos, talment porque encara no l'acceptaba, pero a la curta u a la larga sabeba que amaneixerían fendo surf en una triste competición de dolor y agullonazos en o peito.

Mientres feba un molinet con las suyas garras, cortando l'aire en o suyo codete d'acero impulsau por pizzas, pasta italiana y ensaladas, lo cielo heba pensau que ell sí que iba a plorar. A tarrazos cayeba l'augua dende las tristes boiras, amostrando los suyos planyius pegando truenos. No quereba pensar-ie, en Sara, pero la verdat yera que no podeba contra las circumstancias.

Plegó en l'edificio do viviba. Chipiada; por fuera, d'augua; por dentro, de dolor. Puyaba las escaleras enta lo suyo piso. En chirar lo cantón que le levaba enta lo pasadizo do yera lo suyo piso, vidó una gran caixa de cartón, mas alta que no ella debant d'a puerta suya. I trobó, apegada en la caixa, una nota de Sara. En viyer-la, se dio un tremiu.

- ¿Pero qué ye esto? - sansonió Elisa mirando-se enta la no cosa.

Trucó a las puertas d'os suyos vecins, pero no obtenió las respuestas que miraba, asinas que se decidió a entrar la caixa ta lo suyo piso. La caixa yera muit voluminosa pero yera lichera como lo fumo. Malas que zarró la puerta, esquiadoras d'o país d'a tristura s'esliziron por los caixos en eslalom, plegando en la suya meta, en os labios, deixando una sabor salada. 

Quan la competición finalizó (sin vencedora) Elisa decidió de leyer la nota. Esperanzada de trobar-ie respuestas, s'atrevió a devorar-la, una primer vez, sin entender masiau lo que heba leito, y ya dimpués sabendo lo que leyeba pero sin trobar-le guaire sentiu:

"Ola Elisa:

Sé que no tiengo disculpa por ir-me-ne asinas. Lo siento, pero yo ya no creyeba en esta vida, ya no teneba sentiu. M'hese feito goyo d'haber pasau mas tiempo con tu estes zaguers meses pero no teneba ya fuerzas. No sé si me perdonarás bell día, sisquiera lo faigas. Nomás te pido un zaguer favor, espero que no t'importe pero ye important. Talment pareixca una fatera, pero por favor, no pienses y fe-lo. Has de levar esta caixa ta lo puesto que t'indico en coordenadas (mira en internet) y has de deixar-la allí ta la luna plena d'este mes. Ya sé lo que pensarás, que soi alunada (ya lo pensabas y no te culpo) pero fe-lo por yo. Y fe-lo tu, solo tu. Ah, se m'olbidaba, muit important: NO UBRAS LA CAIXA BAIXO GARRA CIRCUMSTANCIA. Nomás deixa la caixa en o puesto que te digo y olbida-te-ne. No le'n digas a dengún. Gracias.

Lo siento por tot.

Te quiero.

Sara".

Elisa se quedó alumbrada.

- ¿Pero qué significa esto? Puede que fuese una mica rariza, pero no sé cómo calificar esto - Elisa sobateba la cabeza enta los laus en sinyal de negación.

Elisa no trobaba sentiu a lo que heba de fer. No i heba remite ni tampoco no sabeba quí heba deixau ixa caixa debant de casa suya. Se levantó d'o sofá y se miró lo calandario buscando lo plenilunio d'ixe mes. Yera a l'atro'l día. Metió las coordenadas proporcionadas en a caixa en internet. Heba de cruzar la muga, pero no guaire, enta un puesto do no pareixeba haber-ie ni brenca, rodiau de monts en una carretera de montanya. No sabeba qué pensar. Encara que le pareixeba tot muit estranio, decidió de pillar l'auto, conducir 2 horas enta la muga, entrar y trobar lo puesto. Yera cabolioso que si yera una chanza, no teneba gracia, pero decidió de fer-lo.

Un nyudo teneba ligadas con fuerza las neuronas en la cabeza d'Elisa. No podeba pensar, solo conduciba l'auto como si tenese lo piloto automatico d'un avión que no quereba que aterrizar antes con antes. A Elisa le feba goyo de meter musica en l'auto, pero l'unico que i sonaba yera lo rudio d'o motor accelerando y decelerando a cada momento, fendo d'improvisau dj d'una discoteca a las 7 d'o maitino, plena de decadencia. La enorme caixa yera bien ligada en a baca de l'automobil. Sin dubda no pasaba desapercibida, pero yera lo que creyeba que heba de fer.

Como las antigas aduanas ya no existiban, no i habió garra problema en cruzar la muga. Qualques kilometros dentro le esperaba el punto d'entrega, u lo que fuese. Yera una nueit freda, y Elisa tremolaba, pero no por fredor, sino por los niervols movendo-se en instantanios lampitz, en una torrumbesca que quereba meter fin.

Entre montanyas, solenca, trobó lo suyo destín. Yera bien de nueitz, pero la luna plena iluminaba la scena. Aparcó lo coche fuera d'a carretera. Dengún no i pasaba, silencio total. Desenchegó lo motor pero deixó las luces pa poder viyer. Desligó la caixa d'o teito de l'auto y la baixó. La deixó de piet en frent d'as luces de l'auto. Se la miró. Una neurona fotió un espurnallo y blandió lo cerebro. Ubrió los uellos como una caparra, con la variella desencaixada y, sin pensar, se lanzó a foter xarringlazos contra la caixa, rebelando-se contra las palabras de Sara en a nota que pareixeba haber olbidau en una fumada.

La caixa s'ubrió. Una estela de fumo negro s'elevó enta lo cielo. No i heba cosa mas.

- ¿Pero qué dreza ye esta? ¡PERO QUÉ YE ESTO! - Elisa se sentiba acalorada con una sensación d'impotencia, incredulidat y ira. Tanimientres, observó que lo fumo que heba liberau, tornaba a baixar unatra vez.

- Me soi tornando loca - pensó Elisa tapando-se la cara con las mans en sinyal de no poder mas.

Quan se sacó las mans d'a cara, vidó lo fumo en frent d'ella. No se i veyeba guaire, pero gracias a la luz d'a luna y de l'auto se columbraba lo fumo negro, que empecipió a cambiar de forma, prenendo la farcha de Sara.

- ¿Ye que no leyiés la nota? Te l'alvertié, te dicié que no ubrises la caixa, pero no faciés caso, como siempre. Talment por ixo en rabio tanto, de tu, Elisa, ixas fumadas que a veces recorren lo tuyo pensamiento y que nunca no sabes do rematan. Pero esta remata aquí, amiga.

Elisa nomás podió ubrir la boca en sinyal de desconcierto. Pleveba en os suyos uellos y sentiba que lo suyo cuerpo se feba lichero. No podió articular palabra.

- Estoi que esto ye una despedida, Elisa - dició lo fumo con la forma de Sara, que se fació mas corporeo.

Chusto dimpués d'estas palabras, s'acapizó enta Elisa, que no fació garra movimiento defensivo, y nyacó con fuerza lo cuello suyo. Elisa fació un chemeco sordo. Sara pareixeba desintegrar-se china-chana mientres los segundos eternos moriban en una eternidat.

Sara despareixió, quedando Elisa por tierra. Lo suyo corazón, en un momento de desesperación, buscando la paz, deixó de caminar. Dimpués de segundos d'incertidumbre, una purna enchegó lo mecanismo y lo musclo cardiaco tornó a traquetiar unatra vez. Ubrió los uellos, con paz. Se miró arredol. Se miró las mans como si nunca no las hese vistas nunca. Se levantó y se limpió la ropa de polvo y tierra. Se miró la caixa, vueda, sin vida, y tornó la suya vista enta lo coche.

- Elisa, lo siento, agora habré d'estar tu.

The lonely knight

Silent Hill (Día Mundial de la Poesía).

 SILENT HILL

Me fue imposible de viyer
os unicornios libres
en os feners
con cuernos de colors,
os garrapescaires
amorosiando-se os picos
chunto a aquell ibón,
as loiras
explorando curiosas
o lempedo curso d'o río.

Tot disparixió
trusquiu por a boira
y amaneixé
en una ciudat enrobinada
an que de molsa no n'i hai
pa indicar o norte.

Quan a luz caye,
como esbafada,
en o lusco-musco,
si ye que antes podeba
viyer-se-ie gota,
a programación
de turbisca de rudio estatico
d'a radio engarona
os pels de temor
y immobiliza l'humedo aire.

Figuras siniestras
de trache, puro
y truqueta negra,
con esmortecida farcha
sinyalan a presa.

Os basiliscos invaden o espacio
con plumas y uellos de fuego
que me fan piedra
en contactar con os míos.

Os edificios a pirol
de gripias y limacos,
diaples, caminants
y promesas vuedas
no son guaire refuchio.

Resistindo en a foscor
tinto o cristal
de letras grans
pa que a finestra chile
"se busca caballero u caballera,
salven-me, que yo i renuncio".

Mientres aguardo
a turbisca de rudio estatico
d'unatra radio,
zarro os uellos
y pienso en unicornios
con cuernos de colors
en pacificos feners,
y en garrapescaires
amorosiando-se os picos
en aquell ibón,
y en loiras explorando curiosas
o lempedo curso d'o río.

The lonely knight

2021

Muitas son las tradicions y celebracions que cada pueblo en cada rincón de qualsiquier universo celebra malas que el planeta, satelite u asteroide an que viven fa una vuelta entera a la suya estrela. Belunas anclan las suyas radices en l'amaneixer d'os tiempos pa espantar malos espritos u atrayer buenos augurios. Belatras, son modernas y nomás festivas. Mesmo i hai qui no'n fan garra celebración u tradición.

En o planeta Titanus, lo planeta habitau mas gran d'o sistema estelar S772B d'a galaxia Insectia, existe prous tradicions, pero n'i hai una mas cheneralizada. Se desconoixe a punto fixo, pero fa a-saber-los mils d'anyos, una gran estrafalla ixarrotó lo planeta. No se'n conserva guaires documentos, y si n'i hai, son confusos. 

Diz que un asteroide u cometa chocó con Titanus, fendo una estrafalla y una fricasera terribles. Quasi todas las especies de sers vivos crabutoron. Tamién diz que una gran pasa letal en fue la responsable, dica que se'n fue sin mas, como un maldau en cumplir lo suyo obchectivo.

Unatra leyenda diz que qualques dioses chigants, adormius dende que se creyó lo planeta, despertoron. No pareixió fer-les goyo compartir lo planeta con sers inferiors y decidioron d'estricallar-lo tot. Cientos de millons, mils de millons de vidas se perdioron debant d'a suya ira.

Belatra leyenda afirma que lo cielo s'aclisó y no fuoron uns chigants, sino uns invasors d'una civilización muit superior d'atra estrela qui prenioron control d'o planeta, pero acotolando quasi toda vida. Manimenos, igual que con os chigants, quan tot pareixeba perdiu, herois, heroinas les facioron cara y los derrotoron en pagas d'a suya vida.

Quan tot remató, las personas que sobrevivioron decidioron d'instaurar una nueva era de reconstrucción y esperanza y inicioron el nuevo anyo en ixe momento, abrazando y besando a la chent que teneban arredol como sinyal de supervivencia. La tradición se fue repetindo anyo sin atro y, encara que en Titanus fer-se besos y abrazos ye mas bien reduciu a lo rolde mas cercano, quan l'anyo nuevo entra, en Titanus la chent s'abraza y besa, sin importar qui siga.

Diz que, si no se sigue la tradición, las estrafallas tornarán.