La foscor cubriba l'ambient. Cada paso ixordaba el corridor. Difuera la pluya tamboriniaba en las ventanas. La noticia la heba deixada confusa, quasi esturdida, encara que sabeba que arribaría. Vestida con armadura militar e capa, pero sin casco ni tiara u corona, la princesa, agora reina, recorreba el camín enta el suyo destín. No quereba que la veyesen, no quereba que sabesen ta on enfilaba.
El suyo pai, va estar el rei d'una de las pocas ciudatz pobladas que encara existiba dimpués de la dramatica estrafalla que sieglos antes va ocurrir con la puyada de las temperaturas, del nivel del mar u con la extinción de quasi todas las especies animals e vechetals, mas que mas es insectos, que van esvaecer-se sin tornar a estar vistos.
La población humana va diminuir dramaticament. Es ricos van protecher-se en ciudatz seguras, mesmo baixo tierra, vichiladas per exercitos de policías e militars fuertement armaus. E allí van coronar-se monarcas e amos de tot, tamién salvadors de la civilización, encara que van condenar a tot un mundo a las tenebras de la muerte. De bell centenar de ciudatz que en quedaba, van reducir-se a si fa u no fa las dotze actuals per las guerras per es recursos e el poder. Agora la nueva e choven reina heba de decidir el futuro de una de las ciudatz de las Islas del Norte, que se i feba per trobar qualsiquier vestichio d'insectos e de la lenta vuelta a la situación anterior a la Gran Extinción.
Mientres yiba recorrendo el corridor, yiba pensando en tot el sucediu con el suyo pai. Tot yera normal basta el maldito día. El día en que va morir el suyo chirmán el principe hereu al trono de la ciudat. Va estar un accident, pero le van fer la fama a ella. Dende alavez, la relación con el suyo pai va estar trencada. Ella, dispués, yera la hereua, pero va estar maltractada per su pai, que la ridiculizaba e le feba la fama d'una patacada de problemas debant de la nobleza e el suyo Consello.
Manimenos, el suyo pai no va poder apartar-la de la sucesión a la corona, pos no heba aconsiguiu es suficients refirmes ta ixo. Mesmo va prebar de tener mas familietas con qualsiquier muller, pos la suya mai va morir fa tiempo, pero no'n va salir.
Encara que s'heba sacau un peso de dencima, ella no'l sentiba asinas e veyeba que agora en teneba mas, de peso. No sabeba si podría burniar tot el que tendría debant en el suyo reinau. Pero no podeba fer atra cosa que caminar entabant, paso a paso.
La puerta yera debant d'ella. Yera estrenyida, asinas que la va empuixar e va entrar a una estancia fosca, mas encara que no el corridor. Quan va trancar la puerta, allí nomás se i veyeba una tenue luz. Una chicota blanda feba luz e deixaba veyer a una muller. Nomás podeban veyer-se es suyos uellos. Las ninetas reflexaban la flama e la feban pareixer un ser sobrenatural. Mesmo cal que el fuese.
Va posar-se en una silla, debant d'ella. Van cruzar las suyas miradas. Le va fer miedo, pero va reunir prou fuerza ta no reblar. Dimpués de tot el pasau, no yiba a amostrar febleza, amanada a vivir grans desafíos.
L'adovinaire le va dar unas estixeras e le va fer:
- Un floco de pel.
La nueva reina va pillar con decisión las estixeras e va fer un corto en es suyos pels, mirando-se fito-fito es uellos de l'adovinaire, que va extender un dido indicando que aventase el floco al chicot fuego que las separaba.
La blanda va creixer con fuerza mientres bell segundo e va diminuir aspaciet. Un cruixiu contino plenaba es oyius e una intensa ulor a incienso e sucarrina. L'adovinaire va rodiar con las suyas mans la blanda e el fumo e va ixolufrar-los como si toda la verdat de l'universo se i concentrase. Va fer uellos alumbrada.
- Una sinyora blanca e immaculada tornará a fer una visita per estas tierras dispués de muito tiempo - va decir l'adovinaire con solemnidat. La choven reina se la miraba fito-fito, con la respiración a tot meter.
- Una estrela de plata s'acerca. Cayerá en este mundo. La profecía ye amanada a fer-se realidat. Tu habrás de trigar el camín correcto ta que la vida torne, u ta que la muerte siga el suyo camín e continúe ixarrotando tot - un ruflo se le va escapar a la reina mientres l'atra muller feba sentencia.
- Para cuenta, l'acero e el fuego de la traición te rodiarán. Habrás de saber bien l'augua clara e confiar en qui sepas que no te ferá burro falso nunca - va fer l'adovinaire mientres nomás un nombre pasaba pe'l cap de la reina quedando-se gravau dentro.
L'adovinaire va devantar es brazos, tinglando, e va fer:
- Ves e cumple el tuyo destín, una nueva era ye amanada a naixer.
La blanda se va amortar e la foscor el va plenar tot. La ulor de l'incienso entraba per es pulmons. La reina va alentar-lo como si fendo-lo podese saber qué fer con tot el que l'adovinaire le va decir. Va sentir-se sola en la estancia, como si l'adovinaire s'hese esvaeciu chunto a la flama. Va reunir fuerzas e va salir d'ixa cambra. Agora no le quedaba que recorrer el camín de tornada. Ixa nuet no sería facil. Va pensar que la acompanyase l'unico nombre que teneba en la suya ment, pero va declinar ixa opción. Va decidir de sufrir ixa nuet sola. Manyana ya i habría tiempo ta empecipiar a sacar el corbalán.
